سیاسي ګوندونو په ټاکنو کې د خپلو استازیو د څارنې پر مناسبه ونډه ټينګار کړی

(Last Updated On: May 28, 2018 3:08 pm)

په کابل کې د یو شمېر سیاسي ګوندونو استازیو په راروانو ټاکنو کې د سیاسي ګوندونو د ونډې د  زیاتیدو غوښتنه وکړه، چې په دې توګه د ګوندونو استازي ولسي جرګې او د ولسوالیو شوراګانو ته لار ومومي.

دوی وړاندیز وکړ، چې ټاکنې باید د تلې پر لومړۍ نېټه تر سره شي. دغه راز د ټاکنو له ټول بهیر څخه د سیاسي ګوندونو څارونکیو ته د څارنې زمینه برابره او د سیاسي ګوندونو د کاندیدانو رایې نورو ته د لیږد وړ وبلل شي. کډوالو او بیځایه شویو ته په ټاکنو کې د ونډې زمینه برابره او په ناامنو سیمو کې د ټاکنو فرصت مساعد کړي.

د راټولو شویو ګوندونو استازیو ګواښ وکړ، چې که غوښتنې یې ونه منل شي؛ د ټاکنو له خپلواکو کمیسیونونو سره به خپله همکاري وځنډوي.  

د جمعیت ګوند د رهبرۍ شورا غړی محی الدین مهدي وایي: ولسمشر او کمیسیون مو خبرو ته غوږ نه دی نیولی؛ مونږ ترې ګیله او یا پرې نیوکه لرو. کله، چې له مونږ سره خبرې کوي وایي: وړاندیز مو ستونزه نه لري؛ خو کله، چې ولسمشر ته وړاندې کیږو څرګندوي، چې وړاندیز مو عملي ستونزه لري. له دغه راز دوه ګوني چلند سره مونږ له کمیسیون سره خپله همکاري ځنډوو.

د حزب اسلامي غړی عبدالستار خواصي وایي: په کمیسیون کې کمزوري دومره ده، چې ځواکمن ټکي یې له منخه وړي دي. د دارالانشا د رییس ټاکنه کومه غټه خبر نده؛ خپله کمیسیون دې خپلې غوښتنې، چې د حکومت په صلاحیتونو کې دي له ولسمشره وغواړي. دا کار، چې کولی نشي؛ نو بیا ترې د سترو کارونو یا د ولسي جرګې او ولسوالیو شوراګانو د ټاکنو هیله څنګه وشي.

د ټاکنو خپلواک کمیسیون وايي، چې سیاسي ګوندونو ته به له ټاکنو د څارنې زمینه برابره شي؛ خو راروانې ټاکنې به د تېر په پرتله شفافې او رڼې وي.

د ټاکنو خپلواک کمیسیون کمیشنر حفیظ الله هاشمي وایي: د ټاکنو خپلواک کمیسیون یو پراخ، روڼ او پاک نوملړ جوړ کړی، چې خلکو ته به په ټول افغانستان کې د رای ورکوونکیو بشپړ شمېر ښکاره شي. دا بهیر نه یوازې د ولسي جرګې او ولسوالیو شوراګانو د ټاکنو لپاره د ډاډ وړ دی، بلکې د ولسمشرۍ ټاکنو ته هم پراخ رڼښت لري.

د نوملیکنې لومړی پړاو د حمل له ۲۵ پیل شوی او د ثور تر ۲۲ پورې روان ساتل کیږي، چې په دوه یم او درېیم پړاو کې به د نوملیکنې بهیر ولسوالیو او کلیو ته وغزول شي.

که څه هم امنیتي ستونزې او ګواښونه پخپل ځای دي؛ خو د ټاکنو خپلواک کمیسیون د مهالوېش له مخې به د ولسي جرګې او ولسوالیو شوراګانو ټاکنې د روان کال د تلې پر اته ویشتمه تر سره شي.

About Ariana News

Check Also

په ايران کې پر پوځي پريډ وسلوال بريد مرګ و ژوبله اړولې

(Last Updated On: September 22, 2018 2:28 pm) د ایران په جنوب اهواز ښار کې …