عاجل خبرونه

روسیې د مسکو ناسته وځنډوله

(Last Updated On: August 28, 2018 1:17 pm)

ولسمشرۍ په ډاګه کړې، چې ولسمشر اشرف غني د دوشنې پر ورځ( د وږي ۵) مازیګر مهال د روسیې فدراتیف د بهرنیو چارو له وزیر سرګي لاوروف سره تیلیفوني خبرې وکړې، چې په کې د مسکو ناستې له ځنډولو خبر ورکړ شوی دی.

 د خبرپاڼې له مخې؛ په دې تیلیفوني خبرو کې د هېواد ولسمشر په افغانستان کې د دایمي سولې د ټینګېدو په خاطر د نړیوالو او سیمه ییزو دوستانو او شریکانو په ځانګړي ډول د روسیې فدراتیف دولت هڅې وستایلې.

ولسمشر غني ویلي؛ د کابل په دوه یم کنفرانس کې د سولې هر اړخیزه برنامه، چې د افغانستان د خلکو له بېلابېلو اقشارو سره په مشوره او د نړيوالې ټولنې په ملاتړ جوړه شوې وه، سرتاسري او پایدارې سولې ته د رسیدو ټول اساسي اصول یې ټاکلي دي.

 ښاغلي اشرف غني زیاته کړې؛ په خبرو کې باید د افغانانو په مالکیت سوله په پام کې ونیول شي او هر هغه بهیر، چې په دې برخه کې کار کوي؛ په پوره همغږۍ دې ورته چمتوالی ونیسي، چې د دغو ناستو ګټه ډېره شي.

په خبرپاڼه کې دا هم راغلي؛ په دې اړیکه کې د روسیې فدراتیف دولت د بهرنیو چار وزیر وویل، چې مونږ هم د افغانانو په مالکیت سوله غواړو او په دې برخه کې هرې ګټورې همکارۍ ته چمتو یو او له افغان حکومت سره په همغږۍ به هره هڅه او همکاري ترسره کوو.

خبرپاڼې دا هم په ډاګه کړې؛ په دې خبرو کې پرېکړه وشوه، چې د بشپړ چمتووالي او ګټورتوب لپاره به د مسکو ناسته وځنډول شي، چې دواړه هېوادونه په ګډه د دغې ناستې لپاره چمتووالی ونیسي؛ افغانستان او د روسیې دولت به په ګډه د دغې ناستې مدیریت او کوربتوب وکړي. همدارنګه به په دې موده کې د افغانستان حکومت هم په کور دننه سلا مشورې وکړي او هم به د دواړو هېوادونو ترمنځ کاري ډلې د ناستې د څرنګوالي او وخت معلومولو په خاطر ګډ کار وکړي.

ټاکل شوې وه، چې د راتلونکې ستمبر مياشتې په څلورمه د روسيې، چين، ايران او د منځنۍ آسيا هېوادونو په ګډون د افغانستان  د سولې په اړه په مسکو کې ناسته ترسره شوې واى.

روسيې افغانستان او امريکا ته هم په دغه غونډه کې د ګډون بلنه ورکړې وه، خو دواړو هېوادونو د نه ګډون اعلان کړى و.

د طالبانو د قطر دفتر پلاوي له دې مخکې په دغه غونډه کې د ګډون پرېکړه کړې وه؛ خو اوس امریکایانو او طالبانو د یادې ناستې په اړه، چې د افغان حکومت او روسیې په مدیریت به جوړیږي؛ څه نه دي ویلي.

دا په داسې حال کې ده، چې د روسيې دفاع وزارت د افغانستان او تاجکستان پولې ته څېرمه د درقد ولسوالۍ پر اړوند سیمو د روسي الوتکو بریدونه رد کړي او هغه له حقيقته لیرې بولي.

قتیل زوی

About Ariana News

Check Also

په ايران کې پر پوځي پريډ وسلوال بريد مرګ و ژوبله اړولې

(Last Updated On: September 23, 2018 1:42 pm) د ایران په جنوب اهواز ښار کې …