سیمه ییز خبرونه
د ولسي جرگې پر نهه برياليو غړيو باورليكونه ووېشل شول
د ټاكنوخپلواك كميسيون د ولسي جرگې پرهغو نهوغړيو باورليكونه ووېشل، چې په دې وروستيو كې د دغه كميسيون له خوا د ولسي جرگې د برياليو كانديدانو په توگه اعلام شول.
د ټاكنود خپلواك كميسيون رييس وايي، چې:
دا نهه تنه د دوى له دقيقو څېړنو وروسته د ولسي جرگې بريالي كانديدان وپېژندل شول او اوس ورته خپل حق سپاري، چې په دې سره به د خلكو د استازيو په توگه ولسي جرگې ته لاره ومومي.
د ولسي جرگې دا نهه غړي د اتو بېلابېلو ولايتونو اوسيدونكي دي، چې د ولسي جرگې د تېرو ټاكنو په لومړنيو پايلو كې بريالي بلل شوي وه، خو د شكايتونو كميسيون د ولسي جرگې په وروستيو پايلو كې له برياليو كسانو ايستلي وه.
د افغانستان د ټاكنو خپلواك كميسيون رييس فضل احمد معنوي، چې د څلورنۍ(چارشنبې) په ورځ يې پر دغو كسانو د ولسي جرگې د غړيو په توگه باورليكونه وېشل.
نوموړي په دغو مراسمو كې وويل، چې:
د ولسي جرگې د تېرو ټاكنو په بهير كې د ځينو بنسټونو د لاسوهنو له لامله تېروتنې شوې وې ، چې اوس د ټاكنو د خپلواك كميسيون له خوا بېرته سمې شوې.
نوموړى وايي:
له دې سره د ولسي جرگې د تېرو ټاكنو په اړه وروستۍ پريكړه ده او بل هيڅ بنسټ په كې د لاس وهنې حق نه لري .
د ټاكنو خپلواك كميسيون د زمري په دېرشمه د ولسي جرگې له نهو برحالو غړيو د اعتماد رايه واخيسته او نهه معترض نوماندان يې د هغو پرځاى د ولسي جرگې غړي وټاكل.
دا پرېكړه له هغې وروسته د ټاكنو د خپلواك كميسيون له خوا وشوه، چې ولسمشر حامد كرزي دغه بنسټ ته د ټاكنيزو ستونزو د حلولو مسله وسپارله.
كه څه د ټاكنو خپلواك كميسيون رييس فضل احمد معنوي وايي:
دوى د نهه برياليو نوماندانو د بريا په باب پوره دلايل په واك كې لري، خو له قانون څخه د ملاتړ ائتلاف، چې د ولسي جرگې يو شمېر غړي په كې راټول شوي د ټاكنو د خپلواك كميسيون دا كار د قانون خلاف گڼي.
د ټاكنو د خپلواك كميسيون رييس په داسې حال كې، چې وايي:
د ټاكنو اړوند ټول موضوعات له دغه كميسيون سره اړه لري.
د افغانستان د ټاكنو په قوانينو كې د ځينې ستونزو موجوديت تائيدوي او وايي په دې برخه كې د قوانينو جوړولو ته اړتيا ده . نوموړى وايي تراوسه په دې برخه كې درې قوانين جوړ شوي دي.
سیمه ییز خبرونه
د ایران او پاکستان د ګازنللیکې له غځولو ملاتړ نکوو – امریکا
د امریکا د بهرنیو چارو وزارت د سې شنبې پر ورځ ( د وري اوومه) ویلي، چې د ایران او پاکستان د ګازنللیکې له غځولو ملاتړ نکوي او له تهران سره، چې د واشنګټن د بندیزونو له خطر سره مخ دی؛ د سوداګرۍ پر نکولو ټینګار څرګنوي.
د رویټرز خبري اژانس د راپور له مخې؛ د ایران او پاکستان د ګازنللیکه، چې د سولې نللیکه یادېږي.
دغه راز دا نللیکه د تهران او اسلامآباد ترمنځ یوه اوږدمهاله پروژه ده، چې له تېرو څو کلونو راپدیخوا څو ځلې ځنډول شوې او مالي چارې یې له ستونزو سره مخ شوې دي.
دا نللیکه له ایران څخه پاکستان ته، چې ختیځ ګاونډ یې دی؛ طبیعي ګاز لېږدوي.
ایران او پاکستان تېر اوړي دا پېنځه کلن سوداګریز پلان لاسلیک کړ او هوکړه وشوه، چې خپله دوه اړخیزه سوداګري به پېنځه میلیارډ ډالرو ته لوړه کړي.
په دې وروستیو ورځو کې د تهران پر وړاندې د واشنګټن د بندیزونو په اړه د اسلامآباد په تګلاره کې له پاکستانيو چارواکو متضادې څرګندونې اورېدل کېږي.
د پاکستان بهرنیو چارو وزارت ویاندې ممتاز زهرا بلوچ ویلي؛ د پاکستان حکومت له ایران څخه د طبیعي ګازو د واردولو د نللیکې د جوړولو لپاره د امریکا له بندیزونو او اجازې څخه معافیت ته اړتیا نلري.
دغه راز د پاکستان د تېلو وزیر مصدق ملک ټینګار کړی، چې هېواد یې د امریکا له بندیزونو څخه د معافیت په لټه کې دی.
د امریکا بهرنیو چارو وزارت یوه ویاند د سې شنبې پر ورځ په یو خبري کنفرانس کې ویلي: مونږ تل ټولو ته دا مشوره ورکوو، چې له ایران سره سوداګري زمونږ د بندیزونو خطر لري او مونږ له ټولو غوښتي، چې د دې مسلې ټولو اړخونو ته پوره پاملرنه ولري.
له دې مخکې د جنوبي او منځنۍ آسیا په چارو کې د امریکا بهرنیو چارو وزارت مرستیال ډونالډ لو ویلي وه، چې اسلامآباد له ایران سره د ګازو د سوداګرۍ د ترسره کولو لپاره له بندیزونو د معافیت غوښتنه نده کړې او واشنګټن یې ملاتړ نکوي.
تېره میاشت د پاکستان چارسمبالي حکومت د دې نللیکې د ۸۰ کیلومټره برخې د جوړولو منظوري ورکړه، چې تر ډېره حده یې د ۷ میلیارډ ډالرو په پروژه کې د کلونو ځنډونو له کبله ایران ته د میلیاردونو جریمې د ورکولو مخه ونیوله.
ایران او پاکستان د ۲۰۰۹ کال په جون کې د ګازو د پېر او پلور تړون لاسلیک کړ، چې د نللیکې لپاره به د ایران له جنوبي پارس څخه پاکستان ته هره ورځ له ۷۵۰ میلیون څخه تر ۱ میلیارډ مټر مکعب ګاز صادروي.
ایران ادعا کوي، چې تر ۲۰۱۱ کال پورې یې له خپلې غاړې د ۹۰۰ کیلومټره نللیکې د غځولو چارې بشپړې کړي؛ خو د پاکستان له لوري یې د جوړولو کار ندی پیل شوی.
په تېرو کلونو کې ایران څو ځلې پاکستان ته ګواښ کړی، چې د نړیوال منځګړتوب او له تړون څخه د سرغړونې له کبله به ۱۸ میلیارډ ډالره جریمه شي.
د یادونې ده، چې تهران د اټومي پروګرام له کبله له تېرې یوې لسیزې راپدیخوا د واشنګټن تر بندیزونو لاندې دی.
سیمه ییز خبرونه
د مسکو د برید تر شا امریکا، بریټانیا او اوکراین لاس لري – FSB
د روسیې د فډرالي امنیتي خدماتو (FSB) رییس الکساندر بورتنیکوف د سې شنبې پر ورځ څرګنده کړې؛ امریکا، بریټانیا او اوکراین د مسکو د وسلهوال برید تر شا لاس لري، چې په کې لږ تر لږه ۱۳۹ کسان ووژل شول.
اوکراین په دې برید کې، چې پړه یې داعش وسلهوالې ډلې منلې؛ د روسیې تورونه رد کړي دي.
رویټرز راپور ورکړی، چې لویدیځو هېوادونو ویلي؛ د دوی استخباراتي څرګندونې ښیي، چې د داعش افغان څانګه د برید مسووله ده.
روسیې د شنبې پر ورځ ویلي، چې مسکو ته نږدې یې د کنسرت په یوه تالار کې يې پر ډزو او وژنې تورن ټول څلور وسلهوال نیولي دي.
داعش د جمعې د ورځې د وسلوال برید پړه پر غاړه واخیسته؛ خو داسې نښې نښانې شته، چې روسیه یې له اوکراین سره اړیکې څاري. په داسې حال کې، چې اوکرایني چارواکې په کې لاس لرل ردوي.
د مسکو والي اندرې وروبیوف ویلي؛ په ۲۴ ساعتونو کې له کنډوالو څخه ۱۳۳ جسدونه را ایستل شوي او ډاکټران د ۱۰۷ کسانو د ژغورنې لپاره مبارزه کوي.
د دولتي ټلویزیون مدیره مارګریتا سیمونیان پرته له دې، چې سرچینې ته نغوته وکړي؛ د ځاني زیان شمېر ۱۴۳ ښودلی و.
پوتین په یوه ټلویزیوني وینا کې ویلي، چې د څلورو وسلهوالو په ګډون ۱۱ کسان نیول شوي دي.
نوموړی وایي: هغوی د پټېدو هڅه وکړه او اوکراین ته پر لاره ول او د لومړنیو معلوماتو له مخې د اوکراین له لوري د دوی لپاره یوه لار چمتو شوې وه، چې د دولت له پولې تېر شي.
د روسيې د FSB ادارې ويلي، وسلهوالو له اوکراين سره اړيکې درلودې او له پولې سره نږدې نيول شوي دي. د رویټرز د راپور له مخې؛ دوی مسکو ته لېږدول شوي دي.
له دې مخکې د روسیې بهرنیو چارو وزارت ویاندې ماریا زخاروا ویلي وه، چې داعش د امریکا پر دښمنانو برید کوي.
سیمه ییز خبرونه
په بلوچستان کې د پاکستان د بحري ځواک پر هوايي اډه وسلوال برید وشو
د پاکستان د بلوچستان ایالت په تربت ښار کې د پاکستان د بحري ځواکونو پر هوایي ډګر ډلهییز وسلهوال برید شوی دی.
د پاکستان سیمهییزو رسنیو د پاکستان د اړوند چارواکو د څرګندونو له مخې په ډاګه کړې؛ امنیتي ځواکونو د دوشنبې پر شپه د بلوچستان ایالت د بحري ځواکونو په یوه هوايي اډه کې شپږ وسلوال وژلي دي.
ډان ورځپاڼې د مکران د کمشنر سعید احمد عمراني د څرګندونو له مخې ویلي، چې د تربت هوايي ډګر په شاوخوا کې د ډزو او درندو چاودنو راپورونه ورکړ شوي دي.
نوموړي ویلي: وسلهوالو پر هوايي ډګر له درې خواوو څخه بريد وکړ؛ خو امنيتي ځواکونو سمدستي ځواب ورکړ او د هغوى د ورننوتلو هڅه يې شنډ کړه.
نوموړي د مرګ او ژوبلې په اړه کره شمېر څرګند نکړ؛ خو وایي، چې تر دې دمه د سیمې روغتون ته کوم مړى او ټپي ندى رسېدلى.
پي این ایس صدیقي، چې د پاکستان تر ټولو لویه بحري هوايي اډه ده؛ د برید موخه وه.
امنیتي چارواکو د دوشنبې پر شپه ویلي، د تربت هوايي ډګر له پولې بهر “شپږ ترهګر وژل شوي”، چې ورسره د اډې امنیت ډاډمن شوی دی.
هغه زیاته کړې: د حساسو بحري تاسیساتو د زیان راپور هم نلرو.
د سیمې خلکو ویلي؛ په تربت ښارګوټي کې د ۱۲ چاودنو غږونه اورېدل شوي او ډزې، چې د شپې له شاوخوا لس بجو پیل شوې د شپې تر ناوخته روانې وې.
د بلوچستان ازادي غوښتونکي اردو د دې برید پړه منلې ده.
-
تازه خبرونه3 days ago
په پاکستان کې ځانمرګي د ۵ چینايي انجینرانو په ګډون ۶ کسان ووژل
-
سوداگري4 days ago
افغانستان ته د پاکستان راغلی پلاوی پر اقتصادي همکاریو خبرې کوې
-
تازه خبرونه4 days ago
بیات بنیاد په ننګرهار کې اړمنو کورنیو ته د روژې مرستې ووېشلې
-
تازه خبرونه5 days ago
په هرات کې له ۵۰۰ ډېر لرغوني آثار موزیم او آرشیف ته سپارل شوي
-
تازه خبرونه2 days ago
په کابل کې سلګونه اړمنې کورنۍ د بیات بنیاد د روژې له مرستو برخمنې شوې
-
تازه خبرونه4 days ago
د پاکستان په تورخم کې سرحدۍ ځواکونو د فډرالي څېړنو ادارې ۶ کارکوونکي وهلي
-
سوداگري3 days ago
د افغانستان او پاکستان د سوداګرۍ استازیو پر ننګونو خبرې وکړې
-
تازه خبرونه1 day ago
د ټاپي ګاز شرکت اجرائیه رییس له وروستیو پرمختګونو خوښي څرګنده کړه