عاجل خبرونه

د افغانستان او روسيې د ګډ اقتصادي كميسيون دويمه ناسته په كابل كې جوړه شوه

(Last Updated On: September 03, 2013 7:32 pm)

د روسيې دولت او خصوصي سكتور په افغانستان كې په بېلابېلو برخو په ځانګړې توګه برېښنا، د بندونو او واټونو په جوړېدو كې د ګډې پانګونې غوښتننه لري. د اقتصاد وزير د دې مطلب په څرګندولو سره وايي، د افغانستان او روسيې د ګډ اقتصادي كميسيون په دويمه ناسته كې په دې برخو كې له روسيې سره د همكاريو د زياتولو هوكړه ليك لاسليك شو.

د افغانستان او روسيې د ګډ اقتصادي كميسيون دويمه ناسته دا ځل په كابل كې جوړه شوه. د افغانستان د اقتصاد وزير عبدالهادي ارغنديوال وايي:

دا ناسته د دواړو هېوادونو په ګټه ده. ارغنديوال همدارنګه زیاتوي، چې په دې ناسته كې تر ډېره د مسكو د لومړنۍ ناستې د كړو ژمنو د عملي كېدو پر سر خبرې وشوې. كومې ژمنې، چې  د يوه كال په تېرېدو سره نه دي عملي شوي.

ښاغلى ارغنديوال همدارنګه وویل، روسان غواړي په افغانستان كې د برېښنا په برخه كې پانګونه وكړي، او همدا راز غواړي د سروبي دويم بند، چې د ۱۸۰ ميګاواټه برېښنا د توليدولو وړتيا لري، جوړ كړي.

نوموړی زیاتوي، افغانستان د خپلو كانونو په باب له روسيې څخه د معلوماتو د شريكولو غوښتنه لري ځكه د ده په وېنا، روسيې كلونه وړاندې په افغانستان كې د كانونو په برخه كې څېړنې كړې دي.

افغان چارواكي همدا راز له روسانو غواړي، چې په افغانستان كې د پخواني شوروي په پروژو كار وكړي.

بلخوا د روسيې د انرژۍ وزارت مرستيال يوري سينتيورين، چې د افغانستان او روسيې د ګډ اقتصادي كميسيون مشري هم كوي، وايي، روسيه افغانستان د خپل يوه ستر شريك په توګه پېژني او په دې هېواد كې د بنسټيزو پروژو غوښتنه او ملاتړ كوي.

نوموړي همدارنګه ووېل، دغه هوكړه ليك مو تر ډېره د سړك، سالنګ تونل، د اوسپنې د پټلۍ، د برېښنا بند په جوړولو او د برېښنا د مزو پر غځولو، لوړو زدكړو، د ودانيو پر جوړولو، د  خوراكي توكو، نفتي توكو او هوايي ترانسپورتي همكاريو په برخو كې د سوداګريزو راكړو وركړو په زياتوالي تمركز لري. د خصوصي برخې روسي پانګوال، چې شمېر يي له پنځوسو اوړي او له مونږ سره افغانستان ته راغلي، هم غواړي، چې په دې هېواد كې پانګونه وكړي.

ولسمشر حامد كرزي، چې د دوشنبې په ورځ (د وږي ۱۱ )  له دغه ۵۳ كسيز روسي پلاوي سره وكتل، په افغانستان كې د روسيې د هوايي شركت د الوتكو د بيا الوتنو غوښتنه وكړه.

About Ariana News

Check Also

حکومت د سترو پروژو د مدیریت وړتیا نلري

(Last Updated On: September 13, 2018 7:28 pm) د روڼتیا د څار څېړونکي حکومت د …