ایران له افغانستان سره د اوبو لانجه بیا راپورته کړه

(Last Updated On: اګست 28, 2018)

د ايران د بهرنيو چارو وزير له ايران (درې) تلويزيوني شبکې سره په خبرو کې څرګنده کړې، چې مونږ غواړو له افغانستان سره د اوبو د ستونزې اوارولو ته له هرې ممکنې وسیلې کار واخلو .

د ايران د بهرنيو چارو وزير محمد جواد ظريف ويلي، له افغان لوري سره د هلمند سیند د اوبو پر سر خبرې اترې روانې دي.

ښاغلي ظريف د خبريال د دې پوښتنې په ځواب کې، چې آيا ايران د هلمند سيند د حقابې په تړاو پر افغانستان فشار نشي راوستى؟ وويل، ايران دا وړتيا لري؛ خو د حکومت تگلاره يې دا نده.

هغه زیاته کړې، چې مونږ له افغانستان سره په ډېرو برخو کې راکړه ورکړه لرو؛ سرحدي اړيکې، افغان کډوال، د نشه يې توکو موضوع او سوداگري یې ځانګړې بېلګې دي.  

هغه د هلمند سيند د حقابې پر سر په ١٩٧٣م کال کې د دواړو هېوادونو تر منځ لاسليک شوي تړون ته هم اشاره کړې؛ خو وایي، چې د ايران حقابه په منظمه توگه نه ده ترلاسه شوې او د دغې هوکړې د عملي کیدو غوښتونکي يو.

ښاغلى ظريف دا هم ویلي؛ د افغانستان او ايران ترمنځ دوه کاله وړاندې د زدکړو، اقتصاد، امنيت، اوبو او له پولې سره د تړلو مسايلو په تړاو د همکارۍ کډه کميته هم جوړه شوې او هيله ده، چې له افغانستان سره د هلمند او هريرود د سيندونو حقابې موضوع هم حل شي.

ایراني چارواکي په افغانستان کې پر هلمند سیند د برښنا بندونو جوړیدل د اوبو د کموالي اصلي لامل بولي او ټینګار کوي، چې سیستان ولایت له تېرو دوه کلونو راهیسې د اوبو له سخت کمښت سره مخ دی.

افغان حکومت یوازې د هلمند سيند تړون ته ژمنتیا ښودلې او څرګنده شوې، چې د هریرود په اړه تر دې دمه کوم تړون نشته.

هلمند سيند د افغانستان په لویدیځ کې د بابا غره له لوړو سرچینه اخلي او ۱۱ سوه کیلومتره بهیدلو وروسته د ایران او افغانستان ترمنځ ګډ خلیج هامون ته تویېږي.

About Ariana News

Check Also

پاکستان د ترمپ د څرګندونو په وړاندې تند غبرګون ښکاره کړی

(Last Updated On: نوومبر 20, 2018) د پاکستان لومړي وزیر عمران خان د امریکا د …