عاجل خبرونه

اسلام آباد پر افغان طالبانو د پام وړ اغېز لري- سرتاج عزیز

(Last Updated On: مارچ 3, 2016)

vlcsnap-2016-03-03-10h19m20s180د پاکستان د لومړي وزیر د بهرنیو اړیکو سلاکار سرتاج عزیز ومنله، چې اسلام آباد پر افغان طالبانو د پام وړ اغېز لري؛ ځکه، چې مشران یې په پاکستان کې اوسي.

ده وویل، موږ پرطالبانو نفوذ لرو؛ ځکه مشران یې په پاکستان کې دي او له دوی سره طبي مرستې کوو.

د نوموړي په وینا؛ د طالبانو د کورنیو غړي هم په پاکستان کې اوسي. موږ له دې څخه په استفاده کولی شو، چې پر طالبانو فشار راوړو او ورته  دا هم  ویلای شو، چې د سولې خبرو ته حاضر شي.

هغه  په  ډاګه کړه، چې موږ نشو کولای د طالبانو پر ځای له افغان حکومت سره خبرې وکړو؛ ځکه هغه څه ورکولی نه شو، چې افغان حکومت یې ورکولی شي.

سرتاج عزیز دغه خبرې د واشنګتن د بهرنیو اړیکو شورا په څېړنیز انستیتوت کې د خبرو پر مهال کړي دي.

نوموړي دا هم ویلي، چې اسلام آباد پر افغان طالبانو فشار راوړ، چې د ۲۰۱۵ کال د جولای پر اوومه د افغان حکومت له استازیو سره نیغ په نیغه د اسلام آباد په ناسته کې ګډون وکړي.

ده ویلي، چې پاکستان د فشار د دغو وسیلو په کارولو وکړای شول د طالبانو خوزښتونه محدود کړي.

سرتاج عزیر دا هم په ډاګه وویل، چې غواړو روغتونونو او نورو آسانتیاوو ته د دوی لاسرسی هم محدود شي.

هغه همداراز ویلي؛ طالبانو ته به وویل شي که خبرو ته حاضر نه شي، له پاکستان څخه به وشړل شي.

سرتاج عزیز دا هم ویلي؛ د طالبانو مشران مو پوهولي، چې تاسې ته ۳۵ کاله پناه درکړ شوه، نور وخت نه درکوو، ځکه نړۍ مو نور ملامتوي.

دغه خبرې په داسې حال کې راپورته شوي، چې  ټاکل شوې د مارچ پر اوومه په اسلام آباد کې د سولې د څلور اړخیزو خبرو د غزولو یوه بله نوې ناسته هم جوړه شي.

About Ariana News

Check Also

په افغانستان کې میلیاردونه دالر حیف او میل شوي- اشرف غني

(Last Updated On: دسمبر 9, 2018) ولسمشر غني له فساد سره د مبارزې د نړیوالې …