Connect with us

تازه خبرونه

مشرانو جرګه: يو شمېر دولتي کسان مخالفينو ته کار کوي

خپور شوی

د

(Last Updated On: لړم ۲, ۱۴۰۱)

vlcsnap-2017-01-15-18h38m27s117

د مشرانو جرګې يو شمېر غړي وايي چې په هېواد کې د بحران اصلي لامل، هغه کسان دي چې په نظام کې د ننه د وسله والو مخالفینو ګټو ته کار کوي. دوی وايي چې په نظام کې د پنځمې ستنې یادونه کېږي، خو معلومه نه ده چې دا کسان څوک دي.

د مشرانو جرګې ريیس بیا وايي چې د سولې عالي شورا مرستیال د حکومت له دسترخوان څخه وسله والو طالبانو ته د سولې پرښتو خطاب کوي. دی وايي چې د سولې عالي شورا دغه مرستیال باید محکمې ته معرفي شي.

په دې وروستیو کې د دولت له پتې له وسله والو مخالفینو سره د خواخوږۍ اوازونه پورته کېږي. د مشرانو جرګې یو شمېر غړي وايي چې په هېواد کې ځکه بحران ته لاره اواره شوې چې په حکومت کې د ننه د وسله والو مخالفینو له پاره کار کېږي. دوی د سولې د عالي شورا د مرستیال وروستیو څرګندونو ته په اشارې وویل چې په نظام کې د ننه خاین کسان باید محکمه شي.

سناتور گلالۍ اکبري وايي: ” د عبدالحکيم مجاهد وروستۍ خبرې چې طالبان يې د نجات پرښتې بللې وې د اندېښنې وړ خبره ده، دا پرښتې هره ورځ د بې ګناه هېوادوالو وينې تويوي، نو له ولسشمر غواړو چې دا ډول کسان تر تعقيب لاندې ونيسي.”

سناتور شېرمحمد آخند زاده وايي: ” هغه کسان چې د سولې په عالي شورا کې دي او د طالبانو جګړه سپېڅلې بولي، وروڼه او زامن يې ډلې لري او د طالبانو مشران دي، دا کوم عدالت دی چې دولت داسې کسانو ته څوکۍ ورکوي.”

یو شمېر سناتوران بیا وايي چې د سولې عالي شورا هېڅ لاسته راوړنه نه لري او باید چې له منځه یوړل شي.

سناتوره رڼا ترین وايي: ” مخالفين د خلکو له وژلو خوند اخلي او هېڅ کله هم سوله نه مني، د سولې د شورا پيسې دې په نظامي برخه کې ولګول شي او د سولې کتاب دې نور وتړل شي.”

د مشرانو جرګې ريیس وايي، وسله والو طالبانو ته د سولې د پرښتو خطاب، لویه ګناه ده او په حکومت غږ کوي چې د سولې د عالي شورا مرستیال باید محکمې ته معرفي شي.

د مشرانو جرګې رييس فضل هادی مسلمیار وايي: “زه حيران يم چې د دولت له دسترخوان څخه داسې يو غږ پورته شو چې د ملت قاتلينو ته يې د نجات د پرښتو خطاب وکړ، نو په هغه هېواد کې چې محکمه او نظم نه وي، همداسې به کېږي او حکومت ته شرم دی، دا کس بايد ژر تر ژره محاکمه کړل شي.”

په ټوله کې سناتوران وايي چې حکومت کمزوری سیاست لري او نه شي کولای هېواد کې سوله ټينګه کړي.

Advertisement

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټرۍ ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه وه.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!