د نعمت الله زهیر مړی د جنازې لمانځه له ادا کیدو وروسته میدان وردګو د سید آباد په پلرني کلي کې خاورو ته وسپارل شو.

د شنبې ورځې سهار د نعمت الله زهیر بې روحه تن په الوتکه کې د کابل نړیوال هوایي ډګر ته راولیږدول شو، د هغه هم مسلکي دریدلي وه، چې مړی یې پر اوږو واخلي.

له رسنیو د ملاتړ بنسټ مشر صدیق الله توحیدی د ارواښاد زهیر د جنازې په مراسمو کې وویل: حکومت او یو شمېر خلک ځان نه پوهه و ي، چې نه یوازې خبریالان په هېواد کې حقایق د خلکو تر غوږونو رسوي، بلکې د یو رښتیني سرتېري په توګه په شهادت هم رسیږي.

د افغانستان د رسنیو د بازار رییس حامد پویا وایي، چې د زهیر په شهادت رسولو د رسنیو کورنۍ نه یوازې دردیدلې، بلکې اندېښمنه  شوې هم ده.

تر ټولو زیات د زهیر کورنۍ د هغه په فراق کې کورنی زغم له لاسه ورکړی دی. ارواښاد د هلمند د تودې جګړې د لومړۍ کرښې سړی و.

د ارواښاد نعمت الله زهیر ورورعبدالحلیم وایي؛ زهیر د هلمند د تودې جګړې د لومړیو خونړیو کرښو سړی و، چې اوس یې نشتون خپلې او د رسنیو کورنۍ ته دروند ګوزار ګڼل کیږي.

د پوهنتون استاد ذبیح الله حیدري وایي؛ په رښتیا، چې مسلکي، رښتینی او میانه روی خبریال و؛ تل یې د هېواد له یوې جنګ ځپلې او ناامنه سیمې رښتیني او د ډاډ وړ راپورونه وړاندې کړي دي.

د بیات بنیاد فرهنګي سلاکار احسان الله آرینزی وایي، ارواښاد زهیر خپلې کورنۍ، آریانا او افغانانو ته ستره رسنیزه ضایع ده.

د بیات بنیاد مرستیال  حاجي محمد اسماعیل وایي، نعمت الله زهیر آریانا نیوز ته ستره پانګه وه او نشتون یې اوس نه یوازې مونږ، بلکې د رسنیو کورنۍ ته دروند ګوزار دی.

د زهیر په جنازه کې ګام په ګام د هغه ملګرو د نوموړي په اړه خبرې کړې او هغه یې د یو رښتیني خبریال په توګه ستایلی دی.

خبریال فواد ناصري وایي، زهیر هغه څواک و، چې واقعاً یې په مسلکي توګه کار کاوه.هغه له لس کلونو څخه ډېره موده په هغه ولایت کې خبریالي کړې، چې له جنګ، کرکې او وحشت پرته په کې بل څه نشته او هلته یې تل حقایق ښکاره کول.

خبریال وصال میرزی، چې د شهادت په ورځ یې هم له زهیر سره خبرې کړي؛ وایي: ما ترې وپوښتل، چې نن پر کومه سوژه کار کوئ؟ ارواښاد راته وویل؛ نن د جمعې مبارکه ورځ ده ، ما رخصت کړئ! په داسې حال کې، چې خپله یوې نوې نیول شوې سیمې ته په لاره و.

نعمت الله زهیر په ۱۳۸۳ل کال د کابل پوهنتون په ژورنالیزم پوهنځي کې لوړې زدکړې بشپړې کړي، هغه پوره اته کاله له آریانا او آریانا نیوز نړیوالو شبکو او څه باندې لس کاله په نورو رسنیو کې دندې تر سره کړي. ارواښاد زهیر د مبارکې جمعې د سهار په نهه بجو( د لړم ۱۴ کال ۱۳۹۵ ل) د لښکرګاه د دوه یمې حوزې د سره ګودر په سیمه کې له ماین چاودنې شهید شو.

زهیر واده کړی و، چې درې زامن او یوه لور ترې پاتې شول.

تصویراخیستونکي: علي اصغري او سمیع جهش