ولسمشر غني وایي چې په هېواد کې د زور واکانو له خوا د میلیاردونو ډالرو په ارزښت ځمکه غصب شوې ده.

 ولسمشر د ښاروالیو د عوایدو پر زیاتوالي ټینګار کوي او خبرداری ورکوي چې که خلک د ښاروالانو له کړنو راضي نه وي، راتلونکې نه لري. ولسمشر زیاتوي چې په هېواد کې د حکومت ښاري ناکامه تګلاره خلک ځوروي او کابل ښار کې اویا سلنه کورونه له رسمي سند پرته جوړ شوي دي. ولسمشر د  افغانانو په منځ کې د ښاري مالکیت د حس په را منځته کېدو او د ښاري فرهنګ پر رعایت ټینګار کوي.

ښاروالانو ته د ولسمشر تازه خبرداری داې دی، کوم ښاروالان چې خپل عواید زیات نه کړي، د حکومت له خوا به ورته پیسې ورنکړل شي. ولسمشر د ښاروالیو له خوا د نویو پروګرامونو پلي کول د افغانانو کلیدي غوښتنه بولي. خو دی وایي، نور نو له بهرنیو هېوادونو څخه د مرستو له غوښتلو ستړی شوی دی.

ولسمشر  محمد اشرف‌غني وايي: “هر ښار يوه پټه خزانه ده، له ګدایۍ نور ستړي شوو، خو ښه ګدایان يو، په ګدايۍ سره نه شو کولای هېواد ودان کړو، ستاسې په څنګ کې په مليارډونو ډالر ځمکه غصب شوې ده.”

ښاغلی غني په هېواد کې ناکامه ښاري تګلاره د افغانانو له پاره ځورونکې بولي او وایي چې کابل ښار کې اویا سلنه کورونه له رسمي سند پرته جوړ شوي دي او دغه ښار کې په خپلسري توګه د لوړ پوړیزو ودانیو جوړولو پر عادي خلکو سیوری غوړولی دی.

اشرف غني زیاتوي: “که ښاريان تاسې رد کړئ نو ښه راتلونکې نه لرئ، عوايد مو ډېر کړئ، د عوايدو ډېرول ستاسې ازموينه ده، عوايد چې هرڅومره ډېر شي موږ مو مرسته کوو او که ډېر نه شول موږ يوه افغانۍ هم نه درکوو.”

د سیمه ییزو ارګانونو د خپلواکې ادارې سرپرست عبدالباقي پوپل وايي: “موږ په هغې ښاري پروګرامونو سره چې تر لاس لاندې مو دي، هڅه کوو چې په دريو راتلونکو کلونو کې سل زره کسانو ته کار پیدکړو.”

خو د ښاري استوګنې او د ښاري فرهنګ د را منځته کولو له پاره څه باید تر لاس لاندې ونیول شي؟

ولسمشر اشرف غني زیاتوي: “ښاري مالکيت بايد د خلکو په منځ کې جوړ شي، موږ خپل کور پاکوو خو کثافات کوڅې ته غورځوو، بايد چې د خلکو تر منځ د ښاري فرهنګ حس پياوړی کړو.”

د کابل ښاروالۍ سرپرست عبدالله حبیب زی وايي: “د کابل د دروازو عوايد په تېره يوه مياشت کې اووه په سلو کې ډېر شوي دي؛ نو تر راتلونکو اوو کلونو پورې به کابل په يوه په ځان بسيا ښار بدل کړو. موږ همداراز ۱۴۰ تنه په فساد ککړ کسان بندي کړي دي.”

ولسمشر غني دغه راز ټینګار کوي چې وروسته له دې به ښاروالان د ازادو سیالیو له لارې وټاکل شي او پروګرام ته په کتو سره به واک ورکړل شي. هغه وایي، اوس هم د ستر ښار ښاروال د لس میلیون افغانیو په ارزښت د پراختیایي پروګرام د منظوري واک لري.