تازه خبرونه
افغانان ځانونه خوندي نه بولي
په افغانستان کې د ستراتیژیکو او سیمه ییزو څېړنو مرکز تازه موندنې ښيي چې افغانان د خوندیتوب احساس نه کوي او د خپل امنیت په هکله اندېښمن دي.
د دغه مرکز څېړنې ښيي چې زیاتره افغانان د سولې، اقتصادي ودې او ښه حکومت په برخه کې د حکومت هڅې ناکامې ګڼي او په دې باور دي چې د بهرني سیاست له کبله د هېواد ګټې له زیان سره مخامخ شوې دي.
په کابل کې د ستراتیژیکو او سیمه يیزو څېړنو مرکز په خپل تازه راپور کې ویلي چې د پوښتل شوو کسانو اته پنځوس په سلو کې د امنیتي ستونزو د زیاتېدو او د سر د نه خوندیتوب په هکله اندېښنه ښيي. دغه راز نوي په سلو کې پوښتل شوو کسانو ویلي چې حکومت د خدمتونو په چارو کې پاتې راغلی دی.
د ستراتیژیکو او سیمه يیزو څېړنو د مرکز ريیس عبدالباقي امين وايي:”د افغانستان امنيت د خرابېدو په حال کې دی، افغانان ځانونه خوندي نه بولي او د هېواد راتلونکی ډېر تياره بولي.”
په همدې توګه دوه شپېته په سلو کې پوښتل شوو کسانو ویلي چې د سولې په هکله د حکومت هڅې ناکامې شوې دي. دغه راز اته شپېتو په سلو کې پوښتل شوو ویلي چې بهرني سرتېري، په افغانستان کې د سولې د راتګ په لاره کې ستر خنډ دي او شپږ شپېته په سلو کې بیا ویلي چې د سولې عالي شورا هم په خپلو چارو کې پاتې راغلې.
د سولې د عالي شورا ویاند شهزاده شاهد وايي: “د سولې عالي شورا چې کوم هدف ټاکلی و او خلکو هم انتظار ورته لاره، پوره يې نه کړای شوای او بريالۍ نه وه.”
د څېړنې په دې بهیر کې د ملي یووالي د حکومت په بهرني سیاست هم تمرکز شوی، ۸۷په سلو کې ویلي چې د حکومت سیاست نامتوازن دی. دوی له اسلام اباد او ډیلي سره د افغانستان سیاست ته حیران دي او وايي چې له همدې درکه د افغانستان ملي ګټې په زیان کې لوېدلي دي.
سياسي کارپوه موسی فریور وايي: “کومې ژمنې چې دولت له ۱۳۸۰ څخه تر ۱۳۹۰کلونو پورې خلکو ته ورکړې وه، د خلکو له اړتياوو سره سم يې خپلې ژمنې پورې نه کړای شوای.”
اداري فساد بله هغه موضوع ده چې په دغه څېړنه کې پکې تمرکز شوی دی. په دې ارزونه کې ۷۶په سلو کې پوښتل شوو ویلي چې حکومت د اداري فساد په مخنیوي کې پاتې راغلی او ۷۱په سلو کې بیا د کمزورې اقتصادي تګلارې په هکله هم اندېښنه ښودلې ده. د بې کارۍ په لوړه کچه هم اندېښنه ښودل شوې چې د پوښتل شوو کسانو ۸۹په سلو کې له دې اړخه اندېښمن دي.
اقتصادي کارپوه سیف الدین سیحون وايي: “د افغانستان اقتصاد ناقانونه دی چې په نشه يي توکو، د پيسو په منيځلو او فساد ولاړ دی.”
تر دې مخکې د افغانستان د ستراتیژیکو څېړنو مرکز هم په خپله څېړنه کې په ډاګه کړې وه چې د سولې په برخه کې د افغان دولت هڅې ناکامې شوې دي.
تازه خبرونه
د داعش خراسانی مشر د پاکستان په بلوچستان کې دی – رویټرز
رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.
د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.
رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.
رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.
د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.
له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.
د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.
ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.
تازه خبرونه
د رښتر پر کچه ۵ اعشاریه ۲ درجې زلزلې افغانستان ولړزاوه
د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.
دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.
دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.
تر اوسه د دې پېښې د ځاني او مالي زیان په اړه څه ندي ویل شوي.
تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.
تازه خبرونه
د بیات بنیاد د روژې مرسته د بلخ ولایت اړمنو ته ورسېده
بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.
د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.
نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.
هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.
بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.
-
تازه خبرونه2 days ago
په پاکستان کې ځانمرګي د ۵ چینايي انجینرانو په ګډون ۶ کسان ووژل
-
سوداگري3 days ago
افغانستان ته د پاکستان راغلی پلاوی پر اقتصادي همکاریو خبرې کوې
-
تازه خبرونه3 days ago
بیات بنیاد په ننګرهار کې اړمنو کورنیو ته د روژې مرستې ووېشلې
-
تازه خبرونه4 days ago
په هرات کې له ۵۰۰ ډېر لرغوني آثار موزیم او آرشیف ته سپارل شوي
-
تازه خبرونه5 days ago
د ښځو پر وړاندې د اسلامي امارت فرمانونه افغانستان پر بهرنیو مرستو متکي ساتي – رینا امیري
-
تازه خبرونه4 days ago
د پاکستان په تورخم کې سرحدۍ ځواکونو د فډرالي څېړنو ادارې ۶ کارکوونکي وهلي
-
تازه خبرونه2 days ago
په کابل کې سلګونه اړمنې کورنۍ د بیات بنیاد د روژې له مرستو برخمنې شوې
-
سوداگري2 days ago
د افغانستان او پاکستان د سوداګرۍ استازیو پر ننګونو خبرې وکړې