سپینه ماڼۍ دې د افغانستان په اړه خپله ستراتیژي روښانه کړي

(Last Updated On: July 13, 2017 5:52 pm)

د امریکا مشرانو جرګې پر سپینه ماڼۍ غږ کړی، چې د افغانستان په اړه خپله ستراتیژي روښانه کړي.

د افغانستان په اړه د امریکا ناروښانه دریځ د دغه هېواد د مشرانو جرګې د پوځي جرګه ګۍ د ريیس د صبر کاسه ډکه کړې ده.

جان مک کین یو ځل بیا پر سپنه ماڼۍ غږ کړی، چې د افغانستان لپاره خپله ستراتیژي اعلان کړي.

د مشرانو جرګې د دفاعي جرګه ګۍ ريیس جان مک کین وايي، چې د افغانستان په ستراتیژۍ کې باید د پنتاګون تګلارې ته پام وشي.

د مک کین په وینا؛ که سپینه ماڼۍ خپله ستراتیژي مشرانو جرګې ته ونه سپاري، دوی به ستراتیژي ورکړي.

د امریکا د بهرنیو چارو وزارت ویانده هدر ناوئرت ویلي، د افغانستان په اړه زمونږ څېړنې روانې دي. مونږ د ټولو هغو کسانو سره سلا مشورې کوو، چې په دې ستراتیژۍ کې یې نظرونه مهم دي. ستراتیژي به له بهرنیو چارو وزارت څخه دفاع وزارت ته ځي او بیا به د ملي امنیت سلاکار او د هغې ډلې ته سپارل کیږي.

په دې وروستیو کې داسې رپوټونه خپاره شول، چې د ترمپ د ملي امنیت سلاکار په افغانستان کې د سرتېرو د زیاتولو لپاره له دوه امریکايي پوځي شرکتونو سره سلا شوی؛ خو سپینه ماڼۍ وايي، چې تر اوسه په دې اړه معلومات نلري.

ویل کیږي د ملي امنیت سلاکار سپارښتنه کړې، چې په افغانستان کې د امریکايي سرتېرو شمېر باید له ۳۹۰۰ سرتېرو څخه لوړ نه وي.

د امریکا د بهرنیو چارو وزارت د ویاندې مرستیاله سارا سندرز په ډاګه کړې؛ مونږ پوهیږو، چې په دې برخه کې ټولو نظریاتو ته پام وشي. مونږ په شپاړس کلونو کې له پوځي قراردادي شرکتونو څخه ډېره استفاده کړې. همدا اوس لسګونه زره قراردادیان له امریکايي سرتېرو سره خوا په خوا دنده پر مخ بیايي. مونږ د افغانستان حالات ارزوو او هلته به له رهبرانو سره سلا مشورې وشي.

د امریکایي اړوند چارواکو د وینا له مخې؛ د افغانستان لپاره په پراخه ستراتیژۍ کار کیږي، چې د سیمې هېوادونه په ځانګړې توګه پاکستان، هند او ایران هم را نغاړي.

خبریال : فهیم نوري

About Ariana News

Check Also

امریکا د افغانستان په اړه له روسیې سره د همکاریو غوښتنه لري

(Last Updated On: September 21, 2017 5:35 pm) د افغانستان لپاره د روسیې ځانګړي استازي …